DNEVNIK Z ITALIJE - peti dio - RAJKA POLJAK's Creativity

Najbolje je Dnevnik početi čitati iz početka! Vidi OVDJE!

Ovo je je peti dio dnevnika kojeg je Rajka Poljak napisala krajem rujna i početkom 2013. a isti se bazira na iskustvima koje je autorica skupljala za vrijeme realizacije 8. SPIRALNOG KANALA u blizini Assisija, Italija. Mali dio uvoda u ovo štivo je bilo premijerno predstavljeno zagrebačkoj publici u okviru I. gornjogradskog književnog festivala čitano od same autorice 12. listopada u svratištu "Cinkuš", Mletačka 9. Tamo pročitan tekst je objavljen i u Zborniku festivala - ISSN 1849-1413. O Rajkinom nastupu u Zagrebu izvještavalo se u obadva dnevna lista u Liechtensteinu kao i u "Večernjaku".

P e t e k

Baš sem se liepe naspala, morti vu truc Vladekovom herkanju. Dobre vole sem pogledala čez okne, i mam oklopi zaperla. Pak sem znuovič poluknula na same jene oke. Ti kmicu kmičnu, zgledi na dežđ. A mi se spravlamo za Asisi, onak praf po turistički, šklocat vu pervom redu. Mene je rajcal jake lov na one lepe hiže, kamene-plamene, pak da jih poklem vu zimskem sivilu vu Kneževine natenane sljikam i uživlem. Da bi se te plam i lepota vu punemu sjaju mogli doživeti, trieba nam glavni ziestojek: sunčece presvietle. Tak sem ja nadobudne, nadasve uverena u svoju pozitivnu mantru, lepe zaperla oči i meditierala same jenu stvar: beštebeštebešte oblaki. Ili sem nie bila skoncentrierana, ili mi je mantra bila falš, oblaki se bormeš niesu rezbežali, neg još nekak nižejže polegli. Čutela sem zlo. Sejene sme se otpravili, fruštikuvali, pak za Asisija. Marina nam je bila za pervi del dobra vodičica. Otpelala nas je vu La loggie Galleria, vu šteroj bumo vu studenom i mi svojega Osmuga Kanala s temu „Svet na prodaju“ prezentierali. Mislim, ovuga istuga šteruga zdej kopame i zrihtavame. Viš, da nej pozabila reči, osim kaj Vladek kak krtek vredne več četrti den kopa kanala, skupla on i materijala za filma. Šterega bu onda lepe zmontieral, a kak bi nas lepe prezentieral, kak se šika, bez mojuga – laprdanja. Nu, nazaj vu Galeriju. Tuj je baš vu tijeku izložba, a o čem drugem neg o svetemu Frančesku. Točnejše, o dva Frančeska, onemu z trinajstuga veka, šteri je v međuvremenu Asisiju postal čuča kaj več na veke nese zlatna jajca i negvem imenjaku Frančesku kaj je papa, i nie sveti. Još nie. Te drugi Frančesko, kaj Papa je, došel bu v Asisi 4. listopada ovuga leta gospodnjeg. I tak te ze sakuga izloga i okna i zida i rupe glediju dva Frančeska, jen sveti, jen šteri bu te poklem smerti ziher postal.

Izložba? Veljiki formati, vouljejiča v manire stareh majsterov, prikazujeju skerem se, svetuga Franceka i razne prizorje z negvuga života. Za mojuga su ukusa, nekak si ti prizorji bili male preveč – uzvišeni. Jena se umetnica derznula ne nasljikati ni jenuga Frančeska, dražeši je je bil – Asisi. Lepo, je to naredila. Nu dva sveta Frančeska su me se bormeš fejst doteknuli. Pervog je naslikala meni nepoznata umetnica Eleonora Ciroli. Portret sv.Frančeska z frizuru kaj ju talijanka zoveme: naprej po čelu loknice , otraga lepe glava podbrita. Pogled gljibuoki kak vu ranjenoga serndača, a čist pri vuglecu levuga oka se more bormeš primetiti i onie pravi zavodnički šarm rojenuga Talijana. Moja ocena – 5 plus.

Nu, drugi je zapraf moj favorit. Vidiš pečinu vu šteroj se sv.Frančesko moli, a zgledi kak da gliboke meditiera, i ves je nekak pruoziren, bi rekli tielo mu se resplinja od duhovne lepote šteru čuti. Se jeno saki se del tela more videti i to majstorski naslikan veštom rukom gospona Luce Salvatore Alessia. Nekak se tak fine i natenane poigraval svetlom i kmicom na te slike da se zbilam pečina i čovek vu njoj činiju v iste vreme i stvarni i nestvarni. Ma nis mogla oči od nje odlepiti.

Vladekov je favorit bil iste portret sv.Frančeska, same mu nis nigde mogla najti lice. Da sem bolše zagledala sem vidla černu kapulaču na černe mantije kak ponizne spušča černe ruke na černe nič. Ober kapulače, pri verhu slike bile je skerem černe, kak tega jutra nebe pred mojem oknem. Viš ti vraga, sem si misljila, kak je tuj zalutal med se te svete Frančeske. Vladekov mi je favorit tega jutra zezval perve gezmiece po kičme.

Komaj sme se zvliekli vun z Galerije, da nam nej vsa ta čuda Asisija kam zginula. Pogled na nebe mi je govorel da su za sunce šanse jake male, skerem nikakve. Te me pak zbedierale. Stali sme kak zgubleni slučaji na Piazzi del Comuna, a Marina nam je lepe objavila da praf pod naših nuogah migoljiju katakombe, one gljih prave, još z vremena Rimljanov. Mam mi se vu te moje nore glave pričinele da čujem kriku i viku, kaj človječu, kaj lavlju, pak su onie moji gezmieci pak dohajali.

Za same par korake dalše mi se nikakve raspoložejne fejst popravile. Marinča mi se smilila i pokazala zbilam pravu stvar – svod Volta Pinte. Jezušek i marija, kakve je tuo bogohulničke vreme, te 16. viek bile. Certanije na te Pinte su delimične oštečene, delimične namerne poništene, al ne tak jake a da čovek nej mogel pomisliti na sodomu i gomoru renesansnuga doba. Se tuj lepe vidi Lucifer kak mami gole žejnske k sebi, a one mu tancaju i dohajaju. Dalše vidiš pak satira s pravem papki kak dve druge na greha napelava, a one zglediju kak da nega vabiju. Najvekša mi je pak enigma bila, kakvuga te kukca išče roda, s klunem med nogami reskrečene gole žejnske. Puj, puj, sramota i špota celuga svoda Volta Pinte, šteru su fratri duge skrivali, ozarila mi je tmuren i oblačen den. Da me ni vrat tak fejst zabolel bi se ja još duge zgražala nad tem slikarij bogohulničkih. Teši me misel da se Vladek iste jake nad sem tem zgrozil, pak za dokaz poslikal najgrešneše prizorje. Tak bume vu tišine doma imeli dost vremena za zgrajžane. A gduo zna, morti neke i navščime.

Reka ludi nas je dopelala direkt na Via San Frančesko. Vu Asisiju se pak vse zove po tem Frančesku: pizzeria Sv. Francek, bižuterija Sv. Francek, ristorante Sv. Francek, basilikum Sv.Francek... Tuo me vse skup još jemput dopelale do mojuga uverenja da je Cirkva zdavne, gdaj ga je za sveca preglasila, točne znala kaj diela: reklamnu kampanju štere se več na vieke vlieče veliki kapital.

Simptomatične je pak za te petek bile da sem fort menjala respoloženje, Vladek takaj. Hodili sme po te Via S.Frančesko leve-desne, kak sumanuti. Vu pervi sem mah pomišljala da se vu zraku oseča te svete, uzvišene raspoložejne jerbo prihajame te slavne Basilike. Umišlala sem na momente da je i moja svest postala delom kolektivne, pak da me zate obuzimlu boguugodne misli, bratske nesebične lubavi. Onda sem poklem vuru i pol zabludelosti došla k sebe. Sem se prizemlila. Najemput mi je bile bistre da nie tuo nikakve svete raspoložejne, neg obična potrošačka groznica. Od duhe kožnih torbi, hand made, sem umislila da je tamjan. Vražji tamjan, žejnske torbice sake farbe i fele su mi čist zaslepile zdrav razum. Kak drogierana sem išla od štacuna do štacuna dek sem nie čak dvije vu vlasništvu imiela. A Vladekov je pobelar puostal pune tenši. Još sem mu liepe objasnila kak je dobre prešel. Jer da su tergovci čuli da sme z Kroejše mam su mi popusta davalji, kaj me pri Talijanem navek jake veselji. Nu, Lucifer je bil na delu, jer dočim sem se tuorbic dograbila, več sem vu jenomu izlogu zagledala čerlenu rubaču od same čipke, šmugnula sem nutru, pak sem se skerem obeznanela od se te lepote. Sreču buožu, cene su me pak prizvale vu stvarnost. Tak, vodeči tešku buorbu z Luciferom vu meni i pobožnom atmosferom izvan mene, dotepli sme se i pred samu Basiliku Svetuga Franceka. A je praf liepa – zvunjke. Da bi se iskupila za ves onie potrošaki greh, sem skupaj z Vladekem polehko ušetala vu cirkvu. Sem misljila, zde bume se okupali vu božje milosti i blagoslovu i si buju nam grehi i bez spuovedi – oproščeni. Nameste tega, došle mi je kmične pred uoči. V nosa me zbilam puknula duha tamjana, a v polukmice su me vseh zidi gledela namrčena lica nekakšnih davne pokojnih biškupov, velemočnikov , fratrov grdo zadriglih i obritih čelenki. Jezušekimarija,sveti francek i draga moja grešna Magdalena, kam sem ja te vupala? Pak mi se počele pričinjati da čujem kriku i viku, i viš na tuj pred menu lomaču na štere baba gori a si okoli kričiju: coprnica, coprnica, zgorela ti rubačica... Beži vun, sem prepentala Vladeku i zletela čez nekakšna vrata na svetle dana. Vladek me čist sumničave gledel pak je konačne pregovoril: je, znal sem ja da si ti jena od njih, prava zagorska copernica.

Ne znam kaj je te bile, al nije mi dobre sele. Te Cirkve mi same pomutnu v nore glave dielaju. Naviek su mi nekak zvunjke lepše neg znutri. Gdaj mi se vid rezbistrel sem zagledala da je tak i z ovu – sme se našli na nekakvem lepem dugemu, dugemu ganjku z pune lepih jednakih stupov i lukov a med njimi su bili izloženi nekakvi akvareli i certanije z olovku. Porinula sem nosa male bližeše i ostal paf. Tak jednostavni a fini akvarel predstavla zimski pejzaš, točnejše husticu malu štera senke po snegu hiče, a čez sneg čovek hodi. Aha, pak je Sv.Frančesko na tapete. Bolše reči, na papieru. Pak na nekšterom drugom viš ti njega kak vuka sreče, pak na trejte z njim pripovieda, pak ga vuk mile gledi, pak se grliju: čovek i vuk. Poklem mi je Marinča rekla, da je Frančesko zezval vuka, gdaj ga je zestal: oj brate vuče, oj fratelo lupe. Felice Feltracco se zove pak autor ovieh praf liepih akvarelof. A te su akvareli ujedne bili ilustracije za priču šteru je Chiara Frugoni napisala: „San Francesco e il Lupo“. Ne znam kaj je Chiara vu te priče pripoviedala, al znam da sem priču dobre z ovieh akvarelof razmela. Pak sem se uverila da je jena slika kak jezer reč. Se sem razmela i se mi je jasne.

I stvori buog čoveka na svoju sliku i priliku

A čovek je čoveku vuk

Šteri je pak vrak onda buog čoveku?

Vladeka su mučile pune prizemnejše muke, krulile mu je vu želucu, pak mi je predložil da idemo na obeda. Našli sme na te Frančeskove Vie jenuga čist čistuga i simpatičnoga ristorantea. Se je zgledale pristojne i lepe, pak sme se zadovolni zavaljali vu stolce i poručili, a da ni sami nesmo znali kaj poručujeme. Pustili sme da nas lubežliva konobarica iznenadi. Bok i bogme, tak je i bile. Su mi skerem oči na teniera opale gdaj sem vidla kaj sem poručila. Mladi pečeni kumpier je davne ostarel. O količine ne bi iznosila suda, al misljim da su se zanitali, pak su te nije čevapi, da bi se na komade brojili.Šalata je bila mešana, jen del neke male bolši, drugi del vu zadnje faze prepadanja. Glavne jele je bile čista apstraktna umetnost, z naglaskem na apstrakcije. Nis mogla prepoznati kaj te je. Dišale je na tamjana, časna reč če lažem, a takvuga je i okusa imele. Po engleskomu prevodu sem dobila svinjski lungič vu slasnem sosu od bibera i vina. Zde mi je jasne, od bibera nis vidla lungiča.

Vladek je poručil nekaj tak dugoga imena da sem mislila da buju mu s tačkah morali dopelati obeda. Nekakšnu divlač ,morti divlu svinju vu biegu. Vu sakem slučaju, te ficlek kaj mu je žejnska nežno z dva persta prinesla, nie mogel utoliti Vladekovu glad, pak sem ga velikodušne ponudila z onie par krumperkov kaj su jake ostareli, a i kruheka šteri je videl i bolše dane sem mu iste puol prepustila. Se vu semu, tie nas je gastronoumski izlet vu nepoznate koštal pune preveč. Pune penez za nič, a i želucem je napravile nepopravlivu štetu.

Na putu nazaj vu Hižu sme još, silu prilike, žeja nas je natirala, mourali stati pri ristoranteu don Giovanija Mafijoze Staruga. Šteli sme si kak pošteni putniki namerniki spiti male vodice i dvapudek duple kavice, espresne. Moja je triebala biti zašlagierana. No, gdaj sme tam prispelji, Vladek je šmugnul čez onu več nam poznatu đinđafierangu, a ja sem vujnke za najčiščuga stuola kaj sme mogli najti sela i čakala. Čakala sem jene deset minut. Znutraj se nič nie čule, pak sem se več počela poliehke bojati da su mojuga đinđer Vladeka prodali vu belo roble. Fala bogeku dragemu niesu. Vernul se znutraj jahke potresen. Z derhtavi rukah je na stola primetnul za me vodicu, za se kavicu. Gdaj sem ga pitala a gde je moja se buogec ves počel trejsti. Mi je povedal da staruga gospona Mafijaša nie ga bile, a da je poslugu od mladuga Mafijoze dobil, šteri se ponašal ganc pripruoste i siruove, bi se rekle, jake neuluđene. Nikak mu nie mogel objasniti koga bi te vraga ja vu dopio espreso štiela, nie se mogel zmisliti nazivka za šlag na talijanskem, a Mafijaš, mada je glumil engleza, ne razmel ni reč engleščine, nemščine a bokibogme niti hervaščine. Tuj se Vladek ves zmuotal, sprešvical i na kraju krajef same za se kavu donesel. Onda sem ja bila tak nafujnena da ni imel druge neg još jempudek vujti vu tega zde več omržlenoga ristorantea, i donesel mi je prekljeti espreso, bez šlagieranja. Tuo sme zieksalji kak se merzlji gemišti eksaju pak sme dalji petama vetra. Zlu ne triebale, kak se mogle videti, mladi je Mafijaš patil od postpijančevanja, pak se nie bile pometne tam dužeše zaderžavati.

Oko četerte vure po poldanu, vernuli sme se k Hiže. Tak sme se zdogovorili z domačicu mlajšu. Da bu vu te vreme nejni očka prišel z motuorku, pak da peju on i Vladek vu fustu zrušiti par tienkih kolcov, kaj nam je triebale za našuga Spiralnuga kanala. Kak bi zgradili još jenu pozitivnu spiralu – od kolcov. Nu, Očka Enzo ni prihajal kak je obečal, pak je Vladek okoli več skopanuga kanala hodel gljih kak da ga onie seršen nagajna. Nis tega več mogla gledeti, pak sem se zavliekla vu našu sobicu kak bi z meditaciju pak dopelala svoju težke narušenu ravnetežu v normalu. Triebale je vse one spodobe z Bazilike svetuga Franceka hititi vun z glave, da bi se pak napravile mesta za pozitivu.

Morti nej bile zgoršega, gdaj sem več pri meditacije da male te pojam pojasnem, da nej bile zablude. Ima temu več zde prek osemnajst liet kak sem ja, vu težkem delu života najempudek bila presvečena od jene ezoterične žejnske štera se z bijoenergiju bavila. Zapraf je ona lečila moju mater, šteru je gerde rak napal. Ja sem dohajala vu pratne. Pak je ona skužierala da sem ja čist vriti ze svojem telem i duhem, da mi bormeš menše more pomoči neg je pomogla matere mi. I tak mi je preporučila da bi najbolše bile da sama sebi pomorem. Poslala me na Novu Ves, gde se vu te vreme oderžaval tečaj transcedentalne meditacije. Nes ja nič o tem znala, kaj te je i zake služi, nu, mogla sem poslušati uvodnoga predavana pak onda odlučiti aj ja tega očem ili nečem. Sem poslušala, nes preveč ni dalše razmela. Se spominal nekakev sidhi, nirvana, metafizičke neke, pak gljibouke predirane vu samu svoju bit i bitek i tak dalše, gdoj bi tega razmel. Se kaj sem razmela je bile da bu mi pomogle da se dopelam vu ravnetežu i rešim toga vražuga stresa. Same mouram navčiti povolen položaj tela zavzeti, glavu pustiti naj kljima, a vu mislji ponavlati matru šteru mi je vučitelica poviedala na vuhe, v pravem konspirativnem poverejnu. Nišče drugi tu mantru ne zna osim ne i mene. I tak sem ja te naščila, prakticierala i se je počele biti lepše, bolše. Najpre sem primetila da imam več snage, da se bolše i bolše spim, da mi tele neče otrove podnašati. Tak se tu začela teška borba zmed moje mantre i sieh mojih porokov. A bile jih je pune preveč: mese sem preveč jiela, pivu i vine rade vu se trusila, kavu na ljitre, cigaretljine bar dve škatule.... Jezušek i marija, se još i dien denes čudim kak sem još živa. Mantra je vu početku mam dokazala da je močna. Perve su mi cigaretljini počeli smerdeti, pak sem to ignorierala. Onda sem poklem mantranja počela kašlati, kak stari diedek. Onda sem vidla da je vrak odnesel šalu, pak sem z dve škatule prešla na četiri cigaretljine po denu. Pak sem i kavu vugnula. Pak mi je počele mese smerdeti, prešla na makrobijotiku, pijaču sem iste kak suvišnu otpisala.. Živela sem tak lepe i čiste jene lete dan. Redovite meditierala. Život mi se vu sem segmentem jahke popravil. Nis se več obazirala niti na prigovarajne zde več bivšega, šefa nis uopče primečivala,kak niti otrovne komentarje koliegic vu firme. Lasi su mi svetleli, lice takaj, si su z menu rade poviedali o vekšnem smislu živlenja, o tem bitku i nebitku. V međuvremenu je i moja stara pobedila tega raka i bila kak ona stara, otprej boleščine – prgava i kvergava. Niti me ona več preveč ne pogajala. Velim, same vu leto dan meditierana ja sem se preporodila. Onda sem nagle pala vu recidiva. Počele su mi alge i soja preparati izlaziti na vuha vun. Pred očmi su mi se redoviteše preletale pečene guske i race, a kak su tek dišaleeeee, jezušek. Pak daj su onoga špega podimlenoga na poslu rezale, mene su sline prek gupca curele. I tak sem pervi put – posernulna. Da nej špeka pojela, sem popušila 3 cigaretljine, da nej ove da nej one....kaj da velim, vu teden dana sem napustila mantru, a počela pušiti kak turčin. Onda sem se i na pečenke hitila, pak sem jih z pivu zalievala... se več po poznatemu recieptu... sakuga ovisnika o semu i sačemu...

Porinula sem mantru vu stran, makar se ona, muoram priznati još duge povremene javlala, sem misljila same zate da mi grižnu savesti izazouve... A onda sem ju skerem i pozabila. Lieta su prehajala, mantra je zespala. Ovega leta, najempudek, kak te več biva, došla je potrieba da se ista aktiviera. Nekakpak, pak sem zapala vu životni čorsokak. Preveč se tega nakupile, po glavurdače me gerde vudrile, pak se z goršuga na gorše... i onda sem pak „slučajne“ pogledala Na rubu znanosti – Mišaka zde več legendarnuga, i gduo o čem, on o te transcedentalne meditacije. I tak, del mi je bubu h vuhe. Se one kaj je povedal o tem dobrebitima več sem i tak i tak znala... pak sem za ferije sega znajna obnovila, i zde pak liepe, kak se šika – meditieram. Neke sem male morti pametnejša, morti ovie pudek zduram dužeše, morti čak i dokraja, gduo bi ga znal. Če sem neke navščila vu životu duozdej: nigdar ne reči – nigdar.

Poklem ovulikoga traktata, posvečenuga mantre red je i da objasnik kak tuo deluje. Daklem, zauzmem položaja ugodnuga, sedečki, glava slobene klima, ruke i noge pustim naj buju teške. Zaprem oči i prepustim se. Nič koncentracija, nič borba, nič težina. Da misli gerde dojdeju ja se zmisljim na mantru, pak one liepe i prejdeju. Tuj i tam zgubim i mantru, a glava mi na persi opadne, dolna se čuba obijesi, negda i slinim. Kulike tuo traje ne znam točne, ali mi je vučitelica poviedala da sem onda vu tem trenu doteknula sami svuoj bitek. Fučke ga, ili traje prekratke ili je moje pamčene kratke, poklem naviek pozabim tega kak je bile. A znam je dobre bile, aj sem poklem naviek kak nuova spod kladifca. Se obnoviju rezerve štere se potrošiju, dojdeju do najge. Aj bum, i gda bum, dosegla te nirvane – nej znala poviedati.

Vu sakemu slučaju, gdaj sem poklem dvajset minut zišla na dvorišče,moja glava je bila čista, ni jenuga černuga fratra ni beluga biškupa ni vu jne bile.

Vladek je iste vu međuvremenu dobil posla. Enzo je, kak i si talijani, došel pune kesnejše, ali je došel. Zrušil par ščapec vu guste fuste, i zde je Vladek, vesele kak šegrt Hlapič zabijal svoje kolce vu našega Kanala. Bi se rekle, proizvuodil je još jenu spiralu – ovie pudek vu zrak. Gda vsi kolci zabijeni buju (če bu sreče vu subotu bi se te triebale zgoditi), bume je povezali skupaj, alji ne kak za paradajz, neg bume jim napravili još jenu spiralu. Pak na tu spiralu bume kerpice vu bojah sake farbe i fele navezali, a vu saku bum kerpicu, da ju prišivam, zaželela jenu dobru želu. Za Zemlu i se nejne potrebite stanovnike, bilke, živinu a bormeš i ludje. Točnejše tuo bu moj posel. I zate sem zde, puna dobre energije i vuole, začela farbati duge platne tak fletne da je farba fercala sikudek.

Poklem tega kreativnuga momenta i za Vladeka i za me, usledil je skerem incident šteri je mogel hititi senku na našuga medenuga meseca Spiralu ukrašenuga.

A se je počele jake bezazlene. Kak sme one nekej apstraktnuga pojeli za obeda, nisme imeli vuole preveč želuce opteretiti z večerju. Pak sem ja sebe same pahule z mlekem stopila, a Vladeku na tienke nariezala sega pomajčekene. Vu sakem slučaju, bili sme vu zajedničke male kuinice. Tuj se našla i Barek z Australije pak sme se male pospominali. Se je bile jake ugodne i kak se šika. Nu, nekak se vu tem tega, baš pred našuga odlaska, vu kuinice pojavila i Monika. Z Kanade. Pak sme se z nju pozdravili i prešli vu našu sobicu. Nu, viš ti mojega Vladeka. Kak da ga je negdo katapultieral, najemput je skuočil kak da je neke gerde pozabil. Pak prezboril kakti splašene, uzneverene čak: im sem pozabil oprati posudu. Suk Vladek nazaj vu kuinicu. Prejdem ja naivka vu kupaonu, pak se tušieram natenane, poliehko...pak mi najemput vu glavu dojde misel: čake male, kakvu je vražu posudu on, šteri nigdar posudu prati neče, išel prat. Pak sem same jenu zdelicu zmazala... Onda sem jake berže zbrojila dva i dva, ili je bila mantra na delu? Vu sakem slučaju, došla mi je na puomet ona pesmica: monika, monika, monika nie to usna harmonika...jer kak mi je Vladek vu poverejnu poviedal, da sme pervi dan Moniku upoznali, negva je perva asocijacija bila: Levinsky. A tak znači, Vladek dragi, prekljeta rasa muška, pak se na maloletnicu od dvajspet vužgal. Vu mene je takev bes zakipel, da sem skerem samu sebe vužgala. Sreča kaj sem bila pod tušem, pak me on zgasel. Pustila sem merzlu vodu da mi ohladi vruču glavu. Duge sem puščala vodu. Gdaj sem zišla vun, bile je ovak: Vladek vu sobi, pri kompjuterju, glumi kak da je več duge tam. A lepe sem ga čula da se šuljal gljih pol sekunde pre neg sem ja z pod tuša zišla.A lepe sem ga i čula kak se z rečenu Moniku Levinsky smeje i na engleščine spogovarja. Podbočila sem se hladnokervne i pogledala ga otrovne i postavila pitajneodgovor: a šteru si ti to vražu posudu tak duge pral? Očeš da ti ja poviem? i tuo je bile se. Mam je znal da znam, i da takvuga ponašajna terpela ne bum, buokibogmečebum. Ja ga mam na galge obesim, tuj dele, posred sriedi Kanala. Pak bu se vertel vu spiralu dok ga sunčece presvietle ne pretvori vu prsuto. Zapometel si je mojuga pogleda, šteri je se govuoril, poklem ju je zaobilazil kak maček vruču kašu.

Još sem mu jemput poklem pokazala, vu posteli, da sem fejš žejnska, i da me ni dve maloletnice po dvajspet, na delu, ne mreju zameniti. Mislim da si je tuo dobre zapometil, zadovolne je zaherkal. Ja takaj.

Nastavlja se...